ഡിസംബര്‍ 3 ലോക വികലാംഗ ദിനം. (World Disability Day)
വസന്തങ്ങളും, നിറഭേദങ്ങളും, പ്രതീക്ഷകളും, ആഘോഷത്തിമര്‍പ്പുകളും നിറഞ്ഞ ജീവിതത്തിന്റെ ഒരു മറുപുറത്ത്‌ പാര്‍ശ്വവല്‍ക്കരിക്കപ്പെട്ട്‌ ശാരീരികവും, മാനസികവുമായ വെല്ലുവിളികള്‍ നേരിടുന്ന ഒരു കൂട്ടം മനുഷ്യ ജന്മങ്ങള്‍ക്കായി, ലോകജനത മാറ്റി വെയ്ക്കപ്പെട്ടിരിക്കുന്ന ഒരു ദിനം.
ഇന്നത്തെ തിരക്കേറിയ ജീവിത പ്രയാണത്തില്‍ അങ്ങനെ ഒരു സമൂഹം തങ്ങളുടെ വൈകല്യങ്ങളെ മറികടന്ന് നമ്മുടെ ഈ യാത്രയുടെ വേഗത്തിനൊപ്പമെത്താന്‍ കഷ്ടപ്പെടുന്നത്‌ എത്ര പേര്‍ ശ്രദ്ധിക്കുന്നുണ്ട്‌ എന്നറിയില്ല.
അവരുടെ വൈകല്യങ്ങളെ മാറ്റി വെച്ച്‌ കൊണ്ട്‌, അവരുടെ ഉള്ളിലുള്ള യഥാര്‍ത്ഥ കഴിവുകളെ പുറത്തെത്തിച്ച്‌, ‘ഡിസേബിള്‍ഡ്‌’ എന്ന വാക്ക്‌ തുടച്ച്‌ മാറ്റി ‘ഡിഫറന്റ്‌ലി ഏബിള്‍ഡ്‌’ എന്ന അവസ്ഥയിലേയ്ക്ക്‌ ഉയര്‍ത്തി, അവരേയും നമ്മുടെ സമൂഹത്തിന്റെ ഭാഗമാക്കാന്‍ ഒരു പാട്‌ സുമനസ്സുകള്‍ ശ്രമിക്കുന്നുണ്ട്‌.
അവര്‍ക്ക്‌ എന്റെ നന്ദിയും, നന്മകളും നേരുന്നു.
ചാരിറ്റി ഒരു സ്റ്റാറ്റസ്‌ സിംബലും, പണം കൊയ്യാനുള്ള എളുപ്പ മാര്‍ഗ്ഗവുമാകുമ്പോള്‍ ഇത്തരക്കാരെ ചൂഷണം ചെയ്യുന്ന ഒരു വിഭാഗവും ഇവിടെ വളര്‍ന്ന് വരുന്നു എന്നുള്ളതും ഒരു നഗ്ന യാഥാര്‍ത്യമാണ്‌. ഇത്തരം കള്ള നാണയങ്ങളെ നാം തിരിച്ചറിയേണ്ടതും ഒറ്റപ്പെടുത്തേണ്ടതും മനസ്സാക്ഷിയുള്ള ഒരു മനുഷ്യന്റെ കടമയായി ഞാന്‍ കരുതുന്നു.
ശാരീരികവും, മാനസികവുമായ വൈകല്യം ജീവിതത്തിന്റെ പ്രതീക്ഷകളെ താളം തെറ്റിച്ച ഒരു പറ്റം മനുഷ്യ ജീവിതങ്ങളെ കഴിഞ്ഞ ആറു വര്‍ഷങ്ങളായി അടുത്തറിയാനും അവര്‍ക്ക്‌ ഒരല്‍പ്പം സാന്ത്വനവും പരിചരണവും നല്‍കാന്‍ കഴിയുന്നു എന്നുള്ളതും എന്റെ ജീവിതത്തിന്റെ അസുലഭ നിമിഷങ്ങളായി ഞാന്‍ കരുതുന്നു.
അവര്‍ക്കായി എന്റെ കഴിവിന്റെ പരിധിയില്‍ നിന്ന് കൊണ്ട്‌ അവര്‍ക്ക്‌ ഗുണകരമായ എന്തെങ്കിലും ചെയ്യാന്‍ കഴിയുന്നത്‌ എന്റെ ജീവിതത്തിന്റെ നിയോഗമായി ഞാന്‍ കരുതുന്നു.
ആത്മാര്‍ത്ഥമായ എന്റെ ഉദ്യമം വിജയിക്കണമേ എന്ന പ്രാര്‍ത്ഥനയോടെ….